प्रधानमन्त्री राष्ट्रिय पुरुष क्रिकेट छनोट : ललितपुर विजयी

काठमाडौं- प्रधानमन्त्री कप एकदिवसीय पुरुष राष्ट्रिय प्रतियोगिताअन्तर्गत आज भएको वाग्मती प्रदेशको छनोट खेलमा ललितपुर विजयी भएको छ।

ललितपुरले त्रिभुवन विश्वविद्यालयको टोलीलाई १२३ रनले हराएको हो। कीर्तिपुरस्थित त्रिभुवन विश्वविद्यालयको खेल मैदानमा टस जितेर ब्याटिङ गरेको ललितपुरले निर्धारित ४० ओभरमा ९ विकेट गुमाएर २६८ रन बनायो। 

ललितपुरले दिएको २६९ रनको लक्ष्य पछ्याउने क्रममा त्रिविले ९ विकेट गुमाएर १४५ रन मात्र बनायो। २६९ रनको विजयी लक्ष्य पछ्याउने क्रममा त्रिविका लागि पृथु बाँस्कोटाले ४९, सुशान्त तिमल्सिनाले २८ तथा निराकार राईले १० रन बनाए।

बलिङतर्फ ललितपुरका आशुतोष घिरैयाले तीन तथा विपिन आचार्य र सुमित झाले दुई–दुई विकेट लिए।

यसअघि ललितपुरका लागि पवनगोपाल श्रेष्ठले अविजित ११७ रनको शतकीय पारि खेले। उनले १०३ बल खेल्दै तीन छक्का र १० चौका प्रहार गरे।

यस्तै सचिन लेखकले ६८ तथा आशुतोष घिरैयाले ३१ रन बनाए। बलिङतर्फ त्रिविका लागि पृथु बाँस्कोटाले चार तथा सुशान्त तिमल्सिनाले दुई विकेट लिए।