आन्दोलनमा सहभागी एक उखु किसानको मृत्यु

काठमाडौं– उखु बिक्रीको भुक्तानी नपाएको भन्दै दुई सातादेखि आन्दोलनरत एक उखु किसानको मृत्यु भएको छ। 

काठमाडौंको माइतीघर मण्डलामा आन्दोलनमा सहभागी सर्लाहीका किसान नारायण यादवको हृदयाघातका कारण मृत्यु भएको हो।

किसानले उखु बिक्रीको भुक्तानी नपाईकनै आन्दोलन स्थगित गरेको सुनेर बेहोस भएका उनलाई चाबहिलको हेल्पिङ ह्याण्ड्स हस्पिटलमा लगिएको र त्यहाँबाट गंगलाल हृदय रोग केन्द्र बाँसबारी रिफर गरिएको थियो। 

गंगालाल हस्पतालले बिहान करिब साढे ११ बजे मृत घोषणा गरेको किसानका नातेदार मनिष मिश्रले नेपाल समयलाई जानकारी दिए।

जसपाका विद्यार्थी नेतासमेत रहेका मिश्रले हृदयघातकै कारण मृत्यु भएको यकिन नभए पनि सरकारले पैसा दिँदैन कि भन्ने डरले नै बेहोस हुन पुगेको बताए।

‘उनीहरुले ऋण लिएर उखु खेती गरेका थिए। अन्तिममा आएर उखुको पैसा नपाईकनै अरु किसानले सरकारसँग सम्झौता गरेको सुनेर बेहोस हुनुभएको हो,’ मिश्रले भने। उनका अनुसार यादवले अन्नपूर्ण चिनि मिलबाट करिब २४ लाख रुपैयाँ उखुको भुक्तानी पाउनुपर्ने थियो।