कोरोनाबाट ९ सुरक्षाकर्मीको मृत्यु, १४ हजार २ सय संक्रमित

काठमाडौं- महामारीका रुपमा फैलिएको कोरोना भाइरसबाट नेपालमा नौ जना सुरक्षाकर्मीको मृत्यु भएको छ । सशस्त्र प्रहरीका ४, नेपाल प्रहरीका ३  र नेपाली सेनाका २ कर्मचारीको मृत्यु भएको हो।

हालसम्म कोरोनाबाट १४ हजार २ सय ८ जना सुरक्षाकर्मी संक्रमित भएका छन् भने १३ हजार ८ सय ६५ जना निको भएर घर फर्किएका छन्। ३ सय ३४ जना भने आइसोलेशन र उपचार रहेको सुरक्षा निकायले जनाएका छन्।

नेपाल प्रहरीका ७ हजार १ सय ६८ जना संक्रमित भएकोमा ३ जनाको मृत्यु भएको छ। संक्रमितमध्ये ७ हजार १२ जना निको भएर काममा फर्किएका छन् भने १ सय ५३ जना आइसोलेसनमा रहेको केन्द्रीय प्रहरी प्रवक्ता बसन्तबहादुर कुँवरले जानकारी दिए। 

यस्तै नेपाली सेनाका ४ हजार ९ सय ९६ जना संक्रमित भएका छन् भने ४ जनाको मृत्यु भएको छ। संक्रमितमध्ये ४ हजार ८ सय ८४ जना निको भएर काममा फर्किएका छन् भने १ सय १० जना अहिले पनि आइसोलेशनमा रहेको नेपाली सेनाले जनाएको छ। 

त्यस्तै सशस्त्र प्रहरीतर्फ अहिलेसम्म २ हजार ४४ जना संक्रमित भएका छन् भने ४ जनाको मृत्यु भएको छ। संक्रमितमध्ये १ हजार ९ सय ६९ जना निको भएका छन् भने ७१ जना आइसोलेशनमा छन्।

स्वास्थ्य मन्त्रालयका अनुसार नेपालमा मंगलबार बिहानसम्ममा कोरोनाबाट १ हजार ८ सय ३२ जनाको मृत्यु भएको छ । २ लाख ५८ हजार ८ सय ४० जना संक्रमित भएका छन् ।