वार्ताका लागि सरकारले डाक्यो उखु किसानलाई, ३ बजे वार्ता हुने

काठमाडौं– सरकारले आन्दोलनरत उखु किसानलाई वार्तामा बोलाएको छ । 

उद्योग मन्त्रालयले वार्ताका लागि दिउँसो ३ बजे सिंहदरबारमा बोलाएको उखु किसान सङ्घर्ष समितिका संयोजक राकेश मिश्रले जानकारी दिए । उद्योग मन्त्रलायका प्रवक्ता डा नारायणप्रसाद रेग्मीले पनि दिउँसो ३ बजे वार्ता हुन लागेको बताए । 

सरकारसँग सहमतिका लागि उखु किसानले सहमति भएको १५ दिनभित्र उद्योग मन्त्रालयले सबै भुक्तानी गराउनुपर्ने नभए १६ औँ दिनदेखि उद्योगीको सम्पति नियन्त्रणमा लिने प्रक्रिया सुरु गर्नुपर्ने लगायतका सहमतिको सर्त राखेका छन् ।

उद्योगीले दिएको भुक्तानीको सबै विवरण मन्त्रालय र किसानलाई दिनुपर्ने उनीहरुको माग छ । विवरणमा किसानको नाम, बुझाएको परिमाण, दररेट, भुक्तानी भएको रकम स्पष्ट खुलाउन माग गरेका छन् ।

सरकारले माग पूरा हुने ग्यारेन्टी दिएमात्रै सरकारसँग सहमति गरिने उखु किसानहरुले अडान लिएका छन् । 

१६ दिनदेखि काठमाडौंमा प्रदर्शन गर्दै आएका उखु किसानलाई सरकारले ६५ करोड भुक्तानी दिने बताएको छ तर किसानले भने ९० करोडभन्दा बढी भुक्तानी बाँकी रहेको बताउँदै आएका छन् ।