मनकामना केबुलकार खुलेको १६ दिनमै फेरि बन्द 

चितवन- मनकामना केबुलकार सेवा फेरि बन्द हुने भएको  छ ।

कोरोना महामारीका कारण नौ महिनादेखि बन्द रहेको मनकामना केबुलकार मंसिर २८ गतेबाट सञ्चालनमा आएको थियो । सञ्चालनमा आएको १६ दिनपछि भोलिबाट (पुष १४) बाट पुनः बन्द हुने भएको छ । 

नियमित मर्मतसम्भारका लागि पुस १४ गतेदेखि पुस २० गतेसम्म बन्द गर्न लागिएको मनकामना दर्शन प्रालिका नायब महाप्रबन्धक उज्ज्वल शेरचनले जानकारी दिए ।  

लामो समयपछि खुलेको केबुलकारमा यात्रुको चाप बढ्दै गए पनि प्राविधिक निर्देशिका र आवश्यकताअनुसार नियमित बृहत् मर्मतसम्भारको समयतालिकामा अनिवार्य सेवा बन्द गरी मर्मत गर्नुपर्ने भएकाले बन्द गर्न लागिएको उनको भनाइ छ । 

नियमित मर्मतसम्भारपछि पुस २१ गते मङ्गलबारदेखि पुनः नियमित सेवा सञ्चालन गरिने मनकामना दर्शन प्रालिले जनाएको छ ।

मनकामना केबुलकारको सेवा बन्द रहे पनि मनकामना मन्दिर भने भक्तजनका लागि नियमित खुल्ला नै रहने मनकामना मन्दिरका मूल पुजारी इन्सान थापामगरले जानकारी दिए । 

उनका अनुसार सुरक्षा मापदण्ड अपनाएर  दर्शनार्थीका लागि मन्दिर खुला गरिएको छ । गोरखाको शहीद लखन गाउँपालिकास्थित मनकामनामा रहेको मनकामना माता माईको मन्दिर जाने दर्शनार्थीको सहजताका लागि सञ्चालन गरिएको मनकामना केबुलकारको प्रवेशद्वार (बटम स्टेशन) भने चितवनको  इच्छाकामना–४ स्थित चेरेसमा रहेको छ । 

सोही बटम स्टेशनमा रहेको दी मनकामना क्याफे भने नियमित सञ्चालनमा रहने मनकामना दर्शन प्रालिले जनाएको छ  ।