नेकपाको झगडाले मुलुक दुर्घटनामा पर्न थाल्यो : कमल थापा 

वीरगन्ज– राष्ट्रिय प्रजातन्त्र पार्टीका अध्यक्ष कमल थापाले सत्तारुढ दलको आन्तरिक झगडाले मुलुक दुर्घटना उन्मुख भएको बताएका छन्। 

आइतबार पर्साको वीरगन्जमा आयोजित सभालाई सम्बोधन गर्दै थापाले सरकारले काम गर्न नसकेको, कुर्सी, सत्ता र भ्रष्टाचारको भागबन्डाका कारण देश र जनताले संकट भोग्नु परेको बताएका हुन्। 

उनले भने, ‘प्रचण्ड र ओलीको झगडा जनता र देश हितको लागि नभइ भागबन्डा र स्वार्थका लागि भएको हो।’

थापाले वर्तमान समस्या समाधानको लागि व्यक्ति परिवर्तन गरेर मात्रै नहुने भन्दै गलत नीति र बाटो नै बदल्नुपर्नेमा जोड दिएका छन्। 

थापाले राप्रपालाई जनताले विश्वास गरे हिन्दू राष्ट्र, राजसंस्था, विकास र समृद्धि दिने दाबी गरे। 

राजादेखि विप्लव, कांग्रेस, कम्युनिस्टलगायत सबै दल अट्ने व्यवस्था नै राप्रपाको चाहना भएको उनको भनाइ थियो। 

अध्यक्ष थापाले मुलुकले भोग्नु परेको संकट अनि व्याप्त कुशासन र भ्रष्टाचारको अन्त्यको लागि ताजा जनादेशमा जानु पनि उपयुक्त विकल्प भएको बताए।