सुदूरपश्चिममा परीक्षण गरिएकामध्ये १०.२३ प्रतिशतलाई कोरोना संक्रमण

धनगढी– सुदूरपश्चिममा परीक्षण भएकामध्ये १०.२३ प्रतिशतलाई कोरोनाभाइरस संक्रमण देखिएको छ।

प्रदेशमा हालसम्म एक लाख २९ हजार २६५ जनाको कोरोना परीक्षण भएको छ। सोमध्ये १३ हजार २३१ जनालाई कोरोनाभाइरस संक्रमण पुष्टि भएको स्वास्थ्य निर्देशनालय डोटीले जनाएको छ। 

प्रदेश स्वास्थ्य निर्देशनालयका अनुसार प्रदेशमा सबैभन्दा बढी कैलालीमा पाँच हजार ४७५ जनालाई कोरोना संक्रमण देखिएको छ। 

अछाममा १६३८, बैतडी ६५०, बझाङ ८८८, बाजुरा ५१३, डडेल्धुरा ६८४, दार्चुला ३४४, डोटी एक हजार ४०१, कंचनपुर एक हजार ५९१, अन्य प्रदेशका ४५ तथा अन्य देशका २ जनालाई कोरोना संक्रमण पुष्टि भएको निर्देशनालयले जनाएको छ। 

८०.८५ प्रतिशत निको
प्रदेशमा कोरोनाभाइरस संक्रमणपुष्टि भएकामध्ये ८०.८५ प्रतिश निको भएका छन्।   

प्रदेश स्वास्थ्य निर्देशनालयका अनुसार प्रदेशमा हालसम्म १० हजार ६५७ जना कोरोनाभाइरस संक्रमण मुक्त भएका छन्। हालसम्म कोरोनाभाइरस संक्रमण पुष्टि भएकामध्ये ५० जनाको मृत्यु भएको छ।

२०–२९ उमेर समुहकालाई बढी संक्रमण 
प्रदेशमा २०–२९ वर्ष उमेर समूहकालाई बढी कोरोनाभाइरस संक्रमण पुष्टि भएको छ। 

सो उमेर समूहका तीन हजार ६०५ पुरुष र एक हजार ३३१ जना महिलालाई कोरोना संक्रमण पुष्टि भएको छ। सबैभन्दा कम ९०–९९ वर्ष उमेर समूहकालाई कोरोनाभाइरस संक्रमण भएको छ। सो समूहका ८ जना पुरुषलाई कोरोनाभाइरस संक्रमण पुष्टि भएको छ।

३०–३९ उमेर समूहका तीन हजार ३२५, ४०–४९ वर्ष उमेर समूहका एक हजार ५६२, ५०–५९ उमेर समूहका ७७६, ६०–६९ वर्ष उमेर समूहका ३४१, १०–१९ वर्ष उमेर समूहका एक हजार ३४२, ०–९ वर्ष उमेर समूहका ७६९, ७०–७९ वर्ष उमेर समूहका १६०, ८०–८९ उमेर समूहका १२ जनालाई कोरोनाभाइरस संक्रमण पुष्टि भएको तथ्यांकले देखाएको छ।