नयाँ मन्त्रीहरुसहित मन्त्रिपरिषद् बैठक बस्दै

काठमाडौं– प्रधानमन्त्री केपी शर्मा ओलीले मन्त्रिपरिषद् बैठक बोलाएका छन्।

आज मन्त्रिपरिषद् विस्तार गरेका प्रमले अहिले साँझ ८ बजेका लागि बैठक बोलाएका हुन्।

नयाँ मन्त्रीहरुले राष्ट्रपतिबाट शपथ ग्रहण गरेपछि प्रधानमन्त्री निवास बालुवाटारमा मन्त्रिपरिषद् बैठक बस्ने बताइएको छ। 

सात जना मन्त्रीहरुले पदबाट राजीनामा दिएपछि रिक्त रहेको स्थानमा प्रधानमन्त्रीले मन्त्रिपरिषद् विस्तार गरेका हुन्। 

बालुवाटार स्रोतका अनुसार श्रममन्त्रीको जिम्मेवारी प्रभु साहलाई दिइएको छ। साह यसअघि नेकपाको दाहाल–नेपाल समूहको केन्द्रीय कमिटीको बैठकमा सहभागी भएका थिए। उनी दाहाल–नेपाल समूहमा नै रहेको आकंलन गरिए पनि आज मन्त्रीमा नियुक्त भएपछि उनले ओली समूह तर्फ फर्किएको देखिएको छ। 

त्यस्तै पर्यटन मन्त्रीको जिम्मेवारी मणि थापाले पाएका छन् भने शिक्षा मन्त्रीको जिम्मेवारी दावा लामालाई दिइएको छ।

खानेपानी मन्त्रीको जिम्मेवारी गौरीशंकर चौधरीलाई तोकिएको छ। त्यस्तै टोपबहादुर रायमाझीलाई ऊर्जा मन्त्रालयको जिम्मेवारी दिएको बुझिएको छ। 

राष्ट्रपति कार्यालयले आज नै नवनियुक्त मन्त्रीहरुलाई शपथ गराउने कार्यक्रम छ।