ओलीविरुद्ध अविश्वासको प्रस्ताव ५ गते साढे ३ बजे नै दर्ता

काठमाडौं– प्रधानमन्त्री केपी शर्मा ओलीविरुद्ध अविश्वासको प्रस्ताव दर्ता भएको सम्बन्धमा समय परिवर्तन गरिएको भन्ने समाचार बाहिरिएपछि संघीय संघीय संसद् सचिवालयले त्यस सम्बन्धमा प्रष्ट पारेको छ। 

संघीय संसद् सचिवालयका प्रवक्ता डा. रोजनाथ पाण्डेले अविश्वासको प्रस्ताव पुस ५ गते अपराह्न साढे ३ बजे दर्ता भएको प्रस्ट पारेका हुन्।

सभामुखको सचिवालयले भने बिहान साढे १० बजे अविश्वासकोे प्रस्ताव दर्ता भएको जानकारी दिएको थियो। 

सचिवालयले नै सञ्चारमाध्यममा संसद् सचिवालयका कर्मचारीहरुले समय परिवर्तन गरेको जानकारी गराएपछि कतिपय सञ्चारमाध्यममा समय परिवर्तन गरिएको समाचार आएको थियो।

‘अविश्वासको प्रस्ताव प्रतिनिधिसभाका सम्माननीय सभामुखसमक्ष पेस गरी कार्यव्यवस्था शाखामा दर्ता हुने प्रचलन रहेको र २०७७ पुस ५ गतेका दिन पनि सम्माननीय सभामुखज्यूलाई सम्बोधन गरी विधिवत् रुपमा पेस भई सम्माननीय सभामुखज्यूको तोक आदेशभएपछि सोही दिन अपराह्न साढे ३ बजे कार्यव्यवस्था शाखामा दर्ता भएको व्यहोरा जानकारी गराइन्छ,’ पाण्डेले जारी गरेको विज्ञप्तिमा भनिएको छ।