रघुवीर महासेठ : हिजो दाहाल समूहको बैठकमा, आज ओली समूहको वक्ता

काठमाडौं– नेकपा स्थायी कमिटी सदस्य रघुवीर महासेठले केही घण्टामा खेमा परिवर्तन गरेका छन्।

नेकपा अध्यक्ष पुष्पकमल दाहाल–माधवकुमार नेपाल समूहले मंगलबार आयोजना गरेको स्थायी कमिटी बैठकमा सहभागी भएका महासेठ साँझ अर्का अध्यक्ष केपी ओलीको खेमामा लागेका हुन्।  

लामो समयदेखि केपी ओली समूहमै रहेका महासेठ दाहाल–नेपाल समूहको बैठकमा सहभागी भएपछि उनले ओली समूह छोडेका रुपमा हेरिएको थियो।

तर, एकाएक उनी पुनः ओलीकै समूहमा आएका छन्। मंगलबार दिउँसो दाहाल–नेपाल समूहको स्थायी कमिटी बैठकमा सहभागी भए पनि उनी त्यसपछि आयोजना भएको केन्द्रीय समितिको बैठकमा भने सहभागी भएनन्।

उनै महासेठ बुधबार प्रधानमन्त्री केपी शर्मा ओली समूहले सातवटै प्रदेशमा आयोजना गरिरहेको प्रदेश भेलाका रुपमा प्रदेश २ को वक्ताका रुपमा राखिएका छन्। 

महासेठ पत्नी केन्द्रीय सदस्य तथा विघटित प्रतिनिधिसभा सदस्य जुली कुमारी महतो भने ओली पक्षकै बैठकमा सहभागी भइरहेकी छिन्। 

बालुवाटार स्रोतका अनुसार मंगलबार दाहाल–नेपाल समूहको स्थायी कमिटी बैठकमा सहभागी भएर निस्केपछि महासेठले साँझ प्रधानमन्त्रीसँग बालुवाटारमा छलफल गरेका थिए। छलफलपछि महासेठ पुनः ओलीलाई नै समर्थन गर्ने निर्णयमा पुगेको बताइएको छ।