पार्टी कार्यालय कब्जा गर्न तालाबन्दी 

लमजुङ- सत्तारुढ नेपाल कम्युनिस्ट पार्टी (नेकपा) फुटको अवस्था पुगेसँगै जिल्लामा पार्टी कार्यालय कब्जा गर्ने होड चलेको छ ।  एकले अर्को पक्षलाई निषेध गर्ने र कार्यालयमा तालाबन्दी गरेर आफ्नो बनाउने होड चलेको हो । 

लमजुङमा प्रधानमन्त्री समेत रहेका अध्यक्ष केपी ओली निकटका युवा संघका नेताहरुले जिल्ला पार्टी कार्यालयमा ताला लगाएका छन् ।

पूर्व माओवादीबाट जिल्ला अध्यक्ष बनेका मधु अधिकारीलाई पार्टी कार्यालयबाट निकाल्नका लागि ओली निकटका युवा संघका सदस्यहरुले पार्टी कब्जाको प्रयास गरेका हुन् । 

ताला लगाएको पार्टी कार्यालय पूर्व एमालेको हो । हाल जिल्ला नेतृत्व भने साविक नेकपा माओवादी पक्षको छ। 

पार्टी विखण्डनको मुखमा पुगेको भन्दै युवा संघले अध्यक्ष र सचिवको कार्यकक्षमा ताला लगाइएको हो।

काम गर्न नदिने र ताजा जनादेशलाई नस्विकार्नेहरुले पार्टी कार्यालयलाई प्रयोग गरेर षड्यन्त्र गर्न सक्ने भन्दै ताला लगाएको युवा संघ लमजुङका अध्यक्ष ऋषि बस्नेतले बताए।

अर्को निर्णय नभएसम्म ताला नखोल्ने उनको भनाइ छ । नेताहरुको षड्यन्त्र र जालझेल रोक्न ताला लगाउनु परेको उनको दाबी छ ।