नयाँ जनादेश ल्याएर समृद्धिको सपना पूरा गर्छु : ओली

काठमाडौं– प्रधानमन्त्री तथा नेकपाका अध्यक्ष केपी शर्मा ओलीले सरकारले देखेको सपना पार्टीकै अध्यक्ष र वरिष्ठ नेताले चकनाचुर पारिदिएको गुनासो गरेका छन्।

आफू निकट सांसद तथा नेताहरुलाई सम्बोधन गर्दै ओलीले बाध्य भएर आफूले संसद् विघटनको अप्रिय कदम चाल्नुपरेको बताएका थिए। ‘अहिलेको अवस्था आउनुमा प्रचण्ड र माधव नेपालकै दोष छ। न पार्टी एकता पूर्ण भयो, न सरकार राम्रोसँग चलाउन पाइयो। सरकारको काममा बाधा व्यवधान भइरह्यो,’ अध्यक्ष ओलीको भनाइ उद्धृत गर्दै एक केन्द्रीय सदस्यले भनिन्। 

कुनै नियम–कानुन बिना प्रधानमन्त्रीलाई नै फाल्ने गरी अविश्वासको प्रस्ताव आएपछि बाध्य भएर संसद् विघटन गर्नुपरेको ओलीले बताएका थिए।

‘घरै गएर आरोपपत्र फिर्ता लिन आग्रह गरेँ, कुनै हालतमा पनि फिर्ता लिन्न भनेपछि के गर्नु त ? संसद् विघटनछि पनि मिलेर जाउँ भन्दा पनि मान्नुभएन। केन्द्रीय कमिटी बैठकबाट मलाई कारबाही गर्ने भन्नुभा’छ। पार्टीको पहिलो अध्यक्ष मै हुँ। म त बैठकमा जान्न, तपाईंहरु नजानुस्,’ पार्टी फुट्ने नफुट्ने कुरामा केही भन्नुभएन,’ ओलीले भने।

विघटित प्रतिनिधिसभाका सदस्यहरुलाई सम्बोधन गर्दै प्रम ओलीले देशव्यापी रुपमा चुनावी अभियान लिएर जान आग्रह गरेका छन्। ‘अब नयाँ जनादेश ल्याएर सरकार चलाउनुपर्र्छ। जनताले देखेको समृद्धिको सपना पूरा गर्नुपर्छ। देशभरि यो सन्देश लिएर तपाईंहरु चुनावमा होमिनुस्,’ ओलीले भने।  

पार्टी अब एक भएर अगाडि बढ्छ वा फुट्छ भन्नेबारे चाहिँ ओलीले केही नबताएको एक केन्द्रीय सदस्यले बताए।