ओलीको जनताविरोधी कार्यले पार्टी एकतालाई भत्काउन सक्दैन : दाहाल

काठमाडौं– नेकपा अध्यक्ष पुष्पकमल दाहालले प्रधानमन्त्री एवम् अर्का अध्यक्ष केपी ओलीको देश र जनताविरोधी कार्यले पार्टी एकतालाई कुनै असर नगर्ने बताएका छन्। 

दाहालले सोमबार विज्ञप्ति प्रकाशित गरी कुनै व्यक्तिको पार्टी, राष्ट्र र जनता विरोधी कार्यले नेकपाको एकतालाई तात्त्विक असर नपर्ने बताएका हुन्। 

दाहालले भनेका छन्, ‘राष्ट्रको समृद्धि र नेपाली कम्युनिस्ट आन्दोलनको भविष्यको निम्ति पार्टी एकतालाई कमजोर पार्ने सबै प्रकारका प्रवृत्ति र तत्त्वहरुका विरुद्ध एकताबद्ध भएर उभिन तथा कुनै व्यक्तिको पार्टी विरोधी गतिविधिले एकीकृत पार्टीको संरचना र पार्टी एकतालाई भत्काउन सक्ने छैन र त्यस प्रकारको भ्रमात्मक प्रचारमा नपर्न म सबैलाई अपिल गर्दछु।’

दाहालले प्रतिनिधिसभा विघटनको असंवैधानिक, अलोकतान्त्रिक, निरंकुश, पश्चगामी एवम् पश्चगामी कदमलाई स्थायी कमिटी बैठकले विरोध र अस्वीकार गरिसकेको पनि स्पष्ट पारेका छन्।

विज्ञप्तिमा भनिएको छ, ‘पार्टी अध्यक्ष कमरेड ओलीलाई अनुशासनको कारबाहीका निम्ति स्पष्टीकरण माग्ने निर्णय गरेको विषय सार्वजनिक भइसकेको छ।'