दाहाललाई प्रधानमन्त्री बनाउने ९० सांसदको प्रस्तावपछि ओलीद्वारा संसद् विघटन सिफारिस

काठमाडौं– आफू विरुद्ध नेकपाका ९० जना सांसदले संसद् सचिवालयमा अविश्वासको प्रस्ताव दर्ता गरेपछि प्रधानमन्त्री केपी शर्मा ओलीले संसद् विघटनको सिफारिस लिएर राष्ट्रपति निवास पुगेको पाइएको छ।

ती सांसदहरुले प्रधानमन्त्री ओलीलाई पदबाट हटाएर अर्का अध्यक्ष दाहाललाई प्रधनमन्त्री बनाउने प्रस्ताव गरेका थिए। 

नेकपाका सांसदहरु भीम रावल, पम्फा भुसाललगायतले आइतबार बिहान साढे १० बजे संसद् सचिवालयमा पुगेर प्रधानमन्त्री विरुद्ध अविश्वास प्रस्ताव दर्ता गराएको सचिवालय स्रोतले जानकारी दियो।

प्रस्तावमा हस्ताक्षर गर्नेहरुमा केही मन्त्रीहरु पनि छन्। तीमध्ये केही मन्त्रीले राजीनामा घोषणा गरिसकेका छन्।

आफूलाई पदबाट हटाई दाहाललाई प्रधानमन्त्री बनाउने ९० जना सांसदको प्रयासपछि ओलीले संसद विघटनको बाटो रोजेका हुन्। संघीय संसद्मा नेकपा १७४ सदस्य छन्।

राष्ट्रपति विद्यादेवी भण्डारीबाट प्रधानमन्त्रीको सिफारिसमा प्रतिनिधिसभा विघटन गरिएको छ भने ताजा जनादेशका लागि २०७८ वैशाख १७ र २७ गते निर्वाचन मिति घोषणा भएको छ।