दाहाललाई भेटेपछि मन्त्रीहरुलाई भेट्न पुल्चोक पुगे ओली

काठमाडौं- प्रधानमन्त्री केपी शर्मा ओली मन्त्रीहरुको निवास पुल्चोक ललितपुर पुगेर भेटघाट गरेका छन्।

नेकपा अध्यक्षसमेत रहेका ओलीले अर्का अध्यक्ष पुष्पकमल दाहाललाई उनको निवास खुमलटारमै पुगेर भेटेपछि पुल्चोक पुगेर मन्त्रीहरुलाई भेटेका हुन्।

अध्यक्ष ओलीले पुल्चोकमा पुगेर सुरुमा गृहमन्त्री रामबहादुर थापा बादललाई भेटेका थिए।

बादलसँगको छलफलपछि अरु मन्त्रीहरुलाई पनि बादलकै निवासमा बोलाएर भेटघाट गरेको प्रधानमन्त्रीको सचिवालयले जनाएको छ।

मन्त्रीहरुसँगको भेटमा ओलीले समसामयिक राजनीतिबारे छलफल गरेको बताइएको छ।

साथै आफूले अर्का अध्यक्ष दाहाललाई भेट गरेको र भेटमा सरकारका कामबारे दाहालले राखेको चासो, अध्यादेश फिर्ताको विषय पनि मन्त्रीहरुलाई जानकारी गराएको बताइएको छ।

अध्यक्ष ओली लामो समयपछि बालुवाटारबाट निस्किएर विभिन्न ठाउँ पुगेका हुन्।

आफ्नो मिर्गौलाको अपरेशन र त्यसपछि कोरोना भाइरसको महामारीयता ओली बालुवाटार बाहिर नेताहरुलाई भेट्न खासै निस्किने गरेका थिएनन्।
त्यसयता मन्त्रिपरिषद् बैठकसमेत बालुवाटारमै बस्दै आएको छ।