प्रदेश सरकार जडीबुटी उत्पादन गर्ने नर्सरी स्थापना गर्दै

वाग्मती– वाग्मती प्रदेश सरकारले पहिलोपटक रोग प्रतिरोधात्मक प्रजातिको जडीबुटी उत्पादन गर्ने उद्देश्यले नर्सरी स्थापनाको काम थालेको छ। 

उद्योग पर्यटन वन तथा वातावरण मन्त्रालयअन्तर्गत वन निर्देशनालय परिसर हेटौँडामा सात लाखको लगानीमा प्रविधियुक्त नर्सरी स्थापानको काम सुरु भएको निर्देशनालयका सहायक वन अधिकृत गोविन्द अर्यालले जानकारी दिए। 

कोरोना सङ्क्रमणपछि रोग प्रतिरोधात्मक क्षमता बढाउन सेवन गर्न आवश्यक प्रजातिका बिरुवा नयाँ प्रविधिबाट उत्पादन हुनेछन्। गुर्जो, असोगन्धा, तुलसी र सर्पगन्धा प्रजातिका गरी कूल ३० हजार वटा बिरुवा उत्पादन गर्ने लक्ष्य रहेको वन निर्देशनालयले जनाएको छ । 

उत्पादित बिरुवा मागअनुसार प्रदेशभरिका १३ वटै जिल्लासहित अन्य जिल्लाको मागका आधारमा सर्वसाधारणलाई निःशुल्करुपमा  वितरण गर्ने योजना रहेको सहायक वन अधिकृत अर्यालले जानकारी दिए।

आगामी विसं २०७८ को असार मसान्तसम्म बिरुवा तयार गरिने छ। गुर्जो, सर्पगन्धा र असोगन्धा रोपेको एक वर्षमा र तुलसी पाँच–छ महिनामा तयार भई सेवनका लागि उपयुक्त हुने निर्देशनालयले जनाएको छ।