कांग्रेस पदाधिकारी बैठक : अध्यादेशअनुसार हुने निर्णय अमान्य, संसद् बैठक तत्काल बोलाउन माग

काठमाडौं– प्रमुख प्रतिपक्षी दल नेपाली कांग्रेसले सरकारले हिजो मंगलबार जारी गरेको संवैधानिक परिषद् अध्यादेशमा टेकेर सरकारले कुनै निर्णय गरेको भए त्यो पार्टीलाई मान्य नहुने बताएको छ।

आज बुधबार पार्टी सभापति शेरबहादुर देउवाको निवास बूढानीलकण्ठमा बसेको पदाधिकारी बैठकले यस्तो निर्णय गरेको हो। अध्यादेशअनुसार अब पनि कुनै निर्णय भए पनि कांग्रेसले नमान्ने भएको छ।

यद्यपि, उक्त अध्यादेश फिर्ता लिन प्रधानमन्त्री केपी ओली तयार भइसकेका छन्। पार्टीभित्रै चर्को विरोध भएपछि ओली पछि हटेका हुन्। 

कांग्रेसले संसद् अधिवेशन तत्काल बोलाउन पनि सरकारसँग माग गरेको छ। संवैधानिक व्यवस्थाअनुसार संसद्को दुुई अधिवेशनबीचको ग्याप ६ महिनाभन्दा बढी हुनु हुँदैन।

त्यसअनुसार यही पुस १८ गतेभित्र संसद् बैठक बसिसक्नु पर्ने हुन्छ। कांंग्रेसले भने त्यसअघि नै अधिवेशन बोलाउन सरकारसँग माग गरेको छ।