अध्यक्ष ओलीबिनै नेकपा स्थायी कमिटी बैठक सुरु

काठमाडौं– सत्तारुढ दल नेकपाको स्थायी कमिटी बैठक प्रधानमन्त्रीको सरकारी निवास बालुवाटारमा सुरु भएको छ। 

पूर्वनिर्धारित तालिकाअनुसार नै स्थायी कमिटी बैठक सुरू भएको नेकपा अध्यक्ष पुष्पकमल दाहालका प्रेस संयोजक विष्णु सापकोटाले जानकारी दिए।

बैठकअघि पार्टीका अध्यक्षद्वय केपी शर्मा ओली र पुष्पकमल दाहालबीच छलफल भएको थियो। छलफलमा महासचिव विष्णु पौडेल पनि सहभागी थिए।

स्थायी कमिटी बैठकमा हिजो जारी संवैधानिक परिषद् अध्यादेश र दुई अध्यक्षको प्रतिवेदनमाथि छलफल गर्ने कार्यसूची छ । 

बैठकमा पार्टी अध्यक्ष तथा प्रधानमन्त्री ओली भने सहभागी छैनन्। बैठकअघि अर्का अध्यक्षसँगको भेटमा उनले लान्छना पत्रमाथि छलफल हुन्छ भने बैठकमा आउने कल्पना नगर्नुस् भन्ने जवाफ दाहाललाई दिएको बताइएको छ। 

ओली बैठकस्थलमा प्रवेश नगरेपछि दाहालले बैठकमा सहभागी हुन खबर गरेका थिए। त्यस क्रममा पनि उनले आफ्नो अडान दोहोर्याउँदै सहभागी हुन अनिच्छा देखाएको दाहाल निकट स्रोतले बताएको छ।

केही महिनायता नेकपा आन्तरिक किचलोमा फसेको छ।