देशैभरको तापक्रम घट्यो, काठमाडौंको २.८ डिग्री

काठमाडौं- मौसम सफा भएसँगै शीत पर्ने क्रम बढ्दै जाँदा देशभर थप चिसो बढेको छ । 

आज देशका अधिकांश भूभागको न्यूनतम तापक्रम घटेको जल तथा मौसम पूर्वानुमान महाशाखाले जनाएको छ । आज काठममाडाैं उपत्यकामा यो वर्षकै सबैभन्दा कम तापक्रम मापन भएको छ । 

बिहान ८ः४५ बजे गरिएको मापनअनुसार काठमाडौं उपत्यकाको तापक्रम २.८ डिग्री सेल्सियसमा झरेको महाशाखाले जनाएको छ । 

महाशाखाका मौसमविद् समिर श्रेष्ठका अनुसार बिहान ६ः३० बजे गरिएको मापनमा ३.२ डिग्री सेल्सियस तापक्रम थियो । तर, ८ः४५ गरिएको मापनमा भने तापक्रम घटेर २.८ डिग्रीमा झरेको छ । हिजो उपत्यकाको तापक्रम ३ डिग्री मापन भएको थियो ।

यस्तै आज जुम्लाको तापक्रम माइनस ७.१ डिग्रीमा झरेको छ । दिपायलको १.८, डडेल्धुराको ३.५, धनगगढीको ५.४, विरेन्द्रनगरको ३.६, नेपालगन्जको ६.५, घोराहीको ६.२, पोखराको ६.८, ओखलढुंगाको ५.२, ताप्लेजुङको ४.८ डिग्री मापन भएको मौसम पूर्वानुमान महाशाखाले जनाएको छ ।

अझै तापक्रम घट्ने र चिसो बढ्ने क्रम जारी रहने मौसमविद् श्रेष्ठले जानकारी दिए । उनका अनुसार डिसेम्बरको अन्त्यसम्म निरन्तर चिसो बढ्ने छ ।

अहिले तराईका अधिकांश भू-भागमा तथा पहाडका केही भू-भागहरुमा बिहानीपख हुस्सु तथा कुहिरो लागेको छ । हुस्सुका कारण तराई क्षेत्रको अधिकतम तापक्रम घट्दै गएको र जाडो बढ्दै गएको मौसमविद् श्रेष्ठले बताए ।