कोरोना सङ्क्रमित दुई जनाको विराटनगरमा मृत्यु

विराटनगर– कोशी अस्पताल कोभिड १९ उपचार केन्द्र विराटनगरमा कोरोना भाइरस संक्रमित दुई जनाको मङ्गलबार राति मृत्यु भएको छ। 
 
मृतकमध्ये एक जना मोरङको पथरीशनिश्चरे र एक जना सुन्दरहरैँचाका छन्। कोरोना सङ्क्रमित २२ वर्षीय युवक र ७३ वर्षीया वृद्धा महिलाको ज्यान गएको उपचार केन्द्रले जनाएको छ। 
 
सुन्दरहरैँचा नगरपालिका ३ का २२ वर्षीय पुरुषको राति ९ः५० बजेतिर मृत्यु भएको केन्द्रका प्रमुख एवं वरिष्ठ फिजिसियन डा. दीपक सिग्देलले जानकारी दिए। 

उनका अनुसार पीसीआर परीक्षण गराउँदा मंसिर २९ गते रिपोर्ट पोजिटिभ आएपछि युवालाई उपचारका लागि अस्पताल भर्ना गरिएको थियो। 

अस्पताल भर्ना गरेर उपचार थालिएकोमा भोलिपल्ट उनको मृत्यु भएको हो। 
 
पथरीशनिश्चरे नगरपालिका १ की ७३ वर्षीया वृद्धाको पनि राति ८ः५० बजेतिर मृत्यु भएको हो। डा. सिग्देलका अनुसार कोरोना पुष्टि भएपछि उनलाई उपचारका लागि मंसिर २७ गते भर्ना गरिएको थियो। 

मृतकलाई सास फेर्न गाह्रो हुने, ज्वरो आउने, खोकी लाग्नेलगायतका समस्या रहेको अस्पतालले जनाएको छ।