संवैधानिक परिषद् बैठकमा किन गएनन् सभामुख ?

काठमाडौं- नेकपा विवाद उत्कर्षमा पुगेका बेला संवैधानिक परिषद्को बैठकमा सभामुख अग्निप्रसाद सापकोटा उपस्थित नभएपछि अनेक टीकाटिप्पणी भए। 

नेकपा विवादको प्रभाव संवैधानिक परिषद् बैठकमा पनि देखा परेको हो कि भन्ने विश्लेषण गरिएको छ। 

विभिन्न अड्कलबाजी भइरहेकै बेला सभामुखले भने आफू बैठकमा उपस्थित हुन नसक्नुको कारण खुलाएका छन्। 

सभामुखका प्रेस विज्ञ श्रीधर न्यैपानेले प्रेस नोट जारी गर्दै मंसिर २८ र आज राखिएको संवैधानिक परिषद्को बैठकमा सभामुख उपस्थित हुन नसक्नुको कारण खुलाएका हुन्। 

मंसिर २८ गते संघीय संसद सेवा दिवसको पूर्वनिर्धारित कार्यक्रमअन्तर्गत साढे ८ बजे संघीय संसद सचिवालय सञ्चालन तथा व्यवस्थापन समितिको बैठक स्वयं सभामुखले अध्यक्षता गरेकाले उपस्थित हुन नसकेको प्रेस नोटमा उल्लेख छ। सो दिन बिहान ९ बजेका लागि परिषद्को बैठक बोलाइएको थियो। 

मंसिर २८ मा उपस्थित नभएका सभामुख आजको बैठकमा किन उपस्थित हुन सकेनन् त ?

प्रेस विज्ञ न्यौपानेका अनुसार बैठकको पूर्वतयारी, गृहकार्य, आपसी परामर्श र आवश्यक समन्वय अभाव भएकाले सभामुख उपस्थित हुन सकेनन्।

यो विषयमा प्रधानमन्त्रीलाई पनि सभामुखले जानकारी गराएको उनको भनाइ छ।