कञ्चनपुरको महाकालीमा सशस्त्र प्रहरीको बिओपी स्थापना

काठमाडौं- कञ्चनपुरको माहाकाली नगरपालिका १० स्थित कुतिवाकभरमा सशस्त्र प्रहरी बल, नेपालको बोर्डर आउट पोष्ट स्थापना भएको छ।

सशस्त्र प्रहरी अतिरिक्त महानिरीक्षक नारायणबावु थापाले आज बिओपीको उद्घाटन गरेका हुन्। 

बिओपी स्थापना कार्यक्रममा बोल्दै एआईजी थापाले अहिलेको परिस्थितिमा जनताको सेवा, सुरक्षाको ठूलो जिम्मेवारी आएको हुँदा व्यक्तिगत समस्यालाई ध्यानमा राखी अझै बढी अनुसाशित एवम् कर्तव्यनिष्ठ भई कार्यक्षेत्रमा परिचालन हुन निर्देशन दिए।

उनले सीमा क्षेत्रमा हुने अपराधिक क्रियाकलाप नियन्त्रण गर्न सशस्त्र प्रहरीको ठूलो भूमिका रहेको चर्चा गर्दै नेपाल सरकारको नीति अनुरुप सीमालाई अझ बजबुद बनाउन तथा सीमा अपराध नियन्त्रण र रोकथाम गर्न सशस्त्र प्रहरी बल, नेपालको बोर्डर आउट पोष्टहरु थप गर्दै लगिने बताए।

कञ्चनपुर जिल्लाको सदरमुकामदेखि करिब २० किलोमिटरको दूरीमा नेपाल–भारत सीमा नाकाभन्दा करिब २ किलोमिटर वर स्थापना गरिएको उक्त बिओपीले आजैबाट दैनिक कार्य सुचारु गरेको छ। 

कुतियाकभरवासीले लामो समयदेखि सुरक्षा निकायको उपस्थित हुनुपर्ने माग राख्दै आइरहेका थिए।