पीएसजीबाट सय गोल पुर्‍याउने एम्बाप्पे पाँचौ खेलाडी

काठमाडौं– लिग वानअन्तर्गत शनिबार रातिको खेलमा केलियन एम्बाप्पेले मोन्टेपिलरविरुद्ध एक गोल गरे। उक्त गोलसँगै एम्बाप्पेले क्लबबाट लिग वानमा सय गोल पुर्‍याएका छन्।

गएरातिको खेलमा एन्जल डिमारियाको पासमा कोलिन डग्बाले पहिलो गोल गर्दै क्लबलाई सुरुआती अग्रता दिलाएका थिए। मोइस किनले ७७औँ मिनेटमा गोल गर्दै पीएसजीलाई पुनः अग्रता दिलाए।

खेलको ७८औँ मिनेटमा मात्र मोइसे किनलाई प्रतिस्थापन गर्दै मैदान पसेका एम्पाप्पेले लेविन कुर्जवाको पासमा गोल गरे। जुन पीएसजीबाट उनको सयौं गोल थियो।

एम्बाप्पेले इन्ज्युरी समयमा गरेको गोलसँगै गएरातिको खेलमा पीएसजीले मोन्टेपिलरविरुद्ध ३–१ गोलको जीत निकाल्यो।

२१ वर्षे स्टार एम्बाप्पेले १३७ खेलमा सय गोल पुर्‍याएका छन्। उनी सय गोल गर्ने पीएसजीका पाँचौ खेलाडी हुन्।

यसअघि एडिसन काभानीले २००, जलाटन इब्राहिमोविचले १५६, पाउलेटाले १०९ र डोमिनिक राचेतेउले सय गोल गरेका छन्।

एम्बाप्पेले सम्झौता गर्दाको दिने सम्झदै भनेका छन्, ‘मैंले तीन गोल गर्ने पनि सोचेको थिइनँ। सय गोल त धेरै टाढाको कुरा भयो।’

फ्रान्सको राष्ट्रिय टोलीका मुख्य खेलाडी एम्बाप्पे १६५ मिलियन यूरोमा पीएसजी पुग्नुपूर्व मोनाकोबाट पनि २७ गोल गरेका थिए।