कोरोना अपडेट : मृतकको संख्या १३ सय नजिक, ६३ जना भेन्टिलेटरमा उपचाररत

काठमाडौं– स्वास्थ्य तथा जनसंख्या मन्त्रालयको तथ्यांकअनुसार नेपालभर ४६६ जना कोरोना संक्रमित आईसियू तथा भेन्टिलेटरमा उपचाररत छन्। 

६३ जना गम्भिर अवस्थाका कोरोना संक्रमित भेन्टिलेटरमा उपचाररत छन् भने ४०३  जना संक्रमित आईसियूमा छन्।  

शुक्रबार सबैभन्दा बढी बागमती प्रदेशमा १७७ जना आईसियूमा र ३८ जना भेन्टिलेटरमा उपचाररत रहेको मन्त्रालयले जनाएको छ। 

त्यस्तै प्रदेश १ मा ४८ जना आईसियूमा र ६ जना भेन्टिलेटरमा छन् भने प्रदेश २ मा १२ जना आईसियूमा र १ जना भेन्टिलेटरमा छन्। गण्डकी प्रदेशमा ८८ जना आईसियूमा र १२ जना भेन्टिलेटरमा उपचाररत छन्। 

त्यस्तै लुम्बिनी प्रदेशमा ५९ जना आईसियुमा र ५ जना भेन्टिलेटरमा उपचाररत छन्। कर्णाली प्रदेशमा १२ जना आइसियूमा र सुदूरपश्चिममा ७ जना आईसियुमा र १ जना भेन्टिलेटरमा छन्।

पछिल्लो २४ घण्टामा एक हजार ९४५ कोरोना संक्रमित थपिएका छन्। योसँगै कुल संक्रमितको संख्या दुई लाख १६ हजार ९६५ पुगेको छ। 

त्यस्तै पछिल्लो २४ घण्टामा २२ जना संक्रमितको ज्यान गएको छ। यससँगै नेपालमा कोरोना भाइरसका कारण ज्यान गुमाउनेको संख्या एक हजार २९८ पुगेको छ।

२४ घण्टामा पाँच हजार ३६४ जना कोरोना संक्रमणमुक्त भएका छन्। हालसम्म संक्रमणमुक्त हुनेको संख्या एक लाख ९१ हजार २ पुगेको छ। 

देशभर सक्रिय संक्रमितको संख्या २४ हजार ६६५ रहेको स्वास्थ्य मन्त्रालयले जनाएको छ।