बंगलादेशसँग फुटबल खेलेर राष्ट्रिय टोली स्वदेश फर्कियो

काठमाडौं– दुई हप्तायता बंगलादेशको भ्रमणमा रहेको नेपाली राष्ट्रिय फुटबल टोली आज (बिहीबार) स्वदेश फर्किएको छ।

अखिल नेपाल फुटबल संघ (एन्फा)का वरिष्ठ उपाध्यक्ष शिक्षित पराजुलीले त्रिभुवन अन्तर्राष्ट्रिय विमानस्थलमा खेलाडीलाई स्वागत गरेका छन्।

नेपालले बंगलादेशमा घरेलु टिमविरुद्ध दुई खेलको सिरिज खेलेको थियो। कात्तिक २८ मा सम्पन्न पहिलो खेलमा नेपाले २–० गोलको पराजय भोगेको थियो भने दोस्रो खेल गोलरहित बराबरी भएको थियो।

कोरोना महामारीबीच नेपाली फुटबलले टिमले दुई हप्ताको मात्र अभ्यास गरेर फुटबल प्रतियोगितामा भाग लिएको थियो। कोरोना महामारी सुरु भएपछिको पहिलो खेलमा पराजय भोगे पनि यो विश्वकप र एसिया कप छनोटको तयारीको लागि महत्वपूर्ण कदम सावित भएको छ।

सन् २०२१ को  जुन मध्यसम्ममा एसियाली फुटबल महासंघले विश्वकप र एसिया कप छनोटको खेल सक्ने बताएको छ। नेपाले छनोटमा तीन होम गेम खेल्न बाँकी छ।

यता राष्ट्रिय टोलीका व्यवस्थापक मधुसुधन उपाध्याय कोरोना संक्रमण देखिएपछि उनी स्वदेश फर्किएका छैनन्। उनी ढाकास्थित अस्पतालको आइसोलेसनमा छन्।