राष्ट्रपतिमा पराजित ट्रम्पले बर्खास्त गरे रक्षामन्त्री एस्परलाई

अमेरिकी राष्ट्रपति डोनल्ड ट्रम्पले रक्षा मन्त्री मार्क एस्परलाई पदबाट बर्खास्त गरेका छन् ।

राष्ट्रपतिमा पराजित भएका ट्रम्पले ट्वीट गरेर मार्क एस्परलाई बर्खास्त गरेको जानकारी दिएका हुन् । पछिल्ला हप्ताहरुमा ट्रम्प र एस्परबिच सार्वजनिक रुपमै विवाद देखिएको थियो ।

रंगभेद विरोधी प्रदर्शनमा सुरक्षाकर्मीको तैनाथी र प्रयोगलाई लिएर ट्रम्प र एस्परबिच विवाद भएको थियो । ट्रम्पले प्रदर्शन दबाउन सैनिक प्रयोग गर्ने चेतावनी दिँदै आएका थिए । एस्पर त्यसको विपक्षमा थिए ।

 उत्तर एटलान्टिक सन्धि सङ्गठन (नेटो) प्रति राष्ट्रपतिको व्यवहारका विषयमा पनि एस्पर र ट्रम्पबीच फरक मत थियो । सोमवार गरिएको घोषणामा के कारण एस्परलाई निष्कासित गरिएको हो भन्ने कुरा भने खुलाइएको छैन ।

नेशनल काउन्टरटेरोरिजम सेन्टरका हालका प्रमुख क्रिस्टोफर मिलरले एस्परको ठाउँ लिएका छन् । ट्रम्पले एस्पर बर्खास्त भएको घोषणा गरे लगत्तै मिलर रक्षा मन्त्रालयको हेडक्वाटर पेन्टागन प्रवेश गरेको देखिएको बीबीसीले लेखेको छ ।