प्रिमियर लिगमा चेल्सी र लिभरपुल विजयी

काठमाडौं- शनिबार राति सम्पन्न इंग्लिस प्रिमियर लिग (ईपीएल)को खेलमा चेल्सीले बर्नलीविरुद्ध सहज जित निकालेको छ। बर्नलीको घरेलु मैदानमा पाहुना टिम चेल्सीले ३–० गोलको जित निकालेको हो।

चेल्सीका लागि हाकिमी जियाच, कुर्ट जोउमा र टिमो वेर्नरले गोल गरे। खेलको २६ औं मिनेटमा गोल गर्दै जियाचले सुरुवाती अग्रता बनाएका थिए।

पहिलो हाफमा एक गोलले अघि रहेको चेल्सीले दोस्रो हाफमा दुई गोल थप्यो। यसपटक ६३ औं मिनेटमा जोउमाले गोल गरे भने ७० औं मिनेटमा वेर्नरले गोल गर्दै अग्रतालाई तीन गोलसम्म पुर्याए।

जितसहित १२ अंक जोडेका चेल्सी अंकतालिकाको चौथो स्थानमा छ। पराजित बर्नली एक अंकका साथ पुछारमा छ।

लिभरपुलको जित

शनिबार रातिनै सम्पन्न अर्को खेलमा मोहम्मद सलाह र डियोगो जोटाको गोलमा लिभरपुलले वेस्ट हामविरुद्ध जित निकालेको छ।
एनफिल्ड रंगशालामा सम्पन्न खेलमा घरेलु टिम लिभरपुलले २–१ गोलअन्तरको जित निकालेको हो।

लिभरपुल जितसहित शीर्षस्थानमा छ। उसले ७ खेलबाट १६ अंक बनाएको छ भने पराजित वेस्ट हाम ८ अंकका साथ १३ औं स्थानमा छ।