बेन्जेमाकाे गोलमा रियल मड्रिडको सहज जित

काठमाडौं – स्पेनिस ला लिगको शनिबार राति सम्पन्न खेलमा रियल मड्रिडले ह्वेस्काविरुद्ध सहज जित निकालेको छ। 

रियलको अल्फ्रेदो डी स्टेफानो रंगशालामा सम्पन्न खेलमा घरेलु टिमले ४–१ गोलको जित निकालेको हो।

जितका लागि रियलका करिम बेन्जेमाले दुई गोल गरे भने इडेन हजार्ड र फेडेरिको वलवर्डेले एक–एक गोल गरे। 

खेलको ४० औं मिनेटमा वलवर्डेले दिएको पास सदुपयोग गर्दै रियलका हजार्डले पहिलो गोल गरे।

त्यसको पाँच मिनेटलगत्तै स्ट्राइकल बेन्जेमाले गोल गर्दै अग्रतालाई दोब्बर बनाए। उनलाई लुकार भाज्क्वेसले पास उपलब्ध गराएका थिए। 

बेन्जेमाको गोलसँगै पहिलो हाफमै रियलले दुई गोलको अग्रता बनायो। 

दोस्रो हाफमा पनि रियलले दुई गोल थप्यो। ५४ औं मिनेटमा बेन्जेमाले दिएको पासलाई वलवर्डेले गोलमा बदले भने अन्तिम मिनेटमा बेन्जेमाले व्यक्तिगत दोस्रो गोल गरे। उनका लागि रोड्रिगोले पास उपलब्ध गराएका थिए।

यसबीच ७४ औं मिनेटमा ह्वेस्काका डेबड फेर्रेइरोले सान्त्वना गोल गरे। बेन्जेमाको दोस्रो गोलसँगै रियलले ४–१ गोलअन्तरले खेल जित्यो।
जितसँगै १६ अंक बनाएको रियल मड्रिड ला लिगको शीर्षस्थानमा छ भने पराजित ह्वेस्का पाँच अंकका साथ पुछारबाट तेस्रो स्थानमा छ।