बेलायतमा फेरि लकडाउनको तयारी

काठमाडौं- बेलायतमा कोरोना भाइरस संक्रमणको दोस्रो लहर खतरनाक अवस्थामा पुगेपछि पुनः लकडाउनको तयारी गरिएको छ। 

प्रधानमन्त्री बोरिस जोनसनले पुनः लकडाउनको तयारी भइरहेको बताएका छन्। आगामी क्रिशमससम्म अवस्था सामान्य बनाएर लकडाउने खोल्ने गरी पुनः लकडाउनको तयारी गरिएको हो। 

पर्सि सोमबार दोस्रो पटक लकडाउन घोषणा गर्ने तयारी भइरहेको बीबीसीले जनाएको छ। सरकारले दोस्रो चरणको लकडाउनमा विद्यालय, क्याम्पस तथा विश्वविद्यालय भने बन्द नगर्ने योजना बनाएको छ। 

कोरोना भाइरसको महामारी रोक्नका लागि आवश्यक प्रतिबन्धहरु नलगाए पहिलो चरण भन्दा खतरनाक अवस्था आउने भन्दै प्रतिबन्धको तयारी गरिएको हो। 

संक्रमण रोकथामका लागि पुनः लकडाउन नगरिएको दैनिक मृत्यु हुनेको संख्या ४ हजारसम्म पुग्ने प्रक्षपण गरिएको छ। यसअघि बेलायतमा दैनिक मृत्यु हुनेको संख्या १ हजारसम्म पुगेको थियो। 

बेलायतलगायत युरोपभर कोरोना भाइरसको दोस्रो लहर चलिरहेको छ। जसका कारण जर्मनी, बेल्जियम र फ्रान्सले थुप्रै क्षेत्रमा प्रतिबन्ध घोषणा गरिसकेका छन्। 

बेलायतमा अवस्था खराब हुँदै जाने हो भने आगामी हिउँदमा मात्रै ८० हजारभन्दा बढीको मृत्यु हुने आंकलन गरिएको छ।