९९ रन बनाएर आउट हुँदा ब्याट फालेका गेललाई जरिवाना

काठमाडौं- इन्डियन प्रिमियर लिग (आईपीएल) अन्तर्गत शुक्रबार राति सम्पन्न खेलमा नियमविपरित काम गरेको भन्दै आईपीएलले ब्याट्स्मेन क्रिस गेललाई कारबाही गरेको छ।

उनले मैदानबाट बाहिरिने क्रममा आक्रोशित हुँदै ब्याट फालेपछि आईपीएलले कारबाही गरेको हो।

किंग्स इलाभेन पन्जाबका ब्याट्स्मेन गेलले राजस्थान रोयल्सविरुद्धको खेलमा ६३ बलबाट ८ छक्का र ६ चौका प्रहार गर्दै ९९ रन बनाएका थिए।

सो खेलमा उनले टी-२० क्रिकेटमा एक हजार छक्काको कोशेढुंगा पूरा गरेका थिए। गेल टी-२० मा हजार छक्का हाने विश्वकै एक्ला खेलाडी हुन्।

शुक्रबार राति सम्पन्न खेलको अन्तिम ओभरमा आउट भएपछि उनले हातमा भएको ब्याटलाई झट्कारेर फालेका थिए।

उनको व्यवहारलाई लिएर आईपीएल आचारसंहिताअनुसार म्याच फिको १० प्रतिशत जरिवाना गरिएको आईपीएलले एक सूचनामा लेखेको छ।

उनलाई अन्तिम ओभरको चौथो बलमा जोफ्रा आर्चरले आउट गराएका थिए। यससँगै उनी जारी सिजनमा पहिलो शतक बनाउनबाट १ रनले चुकेका छन्।

अबुधाबीमा सम्पन्न उक्त खेलमा राजस्थानले किंग्स इलाभेन पञ्जाबमाथि ७ विकेटको जित निकालेको थियो।

टस हारेर ब्याटिङमा आएको पञ्जाबले पूरा ओभर खेल्दै चार विकेटको क्षतिमा १८५ रन बनाएको थियो। १८६ रनको लक्ष्यका साथ मैदान पसेको राजस्थान रोयल्सले १७.३ ओभरमा दुई विकेट गुमाउँदै १८६ रन बनाएर खेल जित्यो।

यसअघि मुम्बईका ईशान किसनले पनि ९९ रन बनाएका थिए।