आर्सनलको सहज जित, टोटेनहमको पहिलो हार

काठमाडौं– प्रिमियर क्लब आर्सनलले युरोपा लिगमा लगातार दोस्रो जित निकालेको छ।

उसले घरेलु मैदानमा डुन्डल्कलाई ३–० गोलले हराउँदै सहज जित निकालेको हो।

आर्सनलको जितका लागि एड्डी एनकेटी, जेय विलोक र निकोलस पेपेले समान १–१ गोल गरे। 

तीन गोलको अग्रतासहित जित निकालेको आर्सनल छ अंकसहित समूह बीको शीर्षस्थानमा छ।

समान ६ अंकका साथ नेर्वेजियन क्लब मोल्डे दोस्रो स्थानमा छ। यता पराजित डुन्डल्क भने पुछारमा छ।

त्यस्तै बिहीबार राति नै सम्पन्न अर्को खेलमा टोटेनहम १–० गोअन्तरले एन्टवेर्पको मैदानमा पराजित भएको छ।

जितसहित सुदख सुरुवात गरेको टोटेनहमले दोस्रो खेलमा पहिलो हार बेहोरेको हो। 

यता एन्टवेर्पको जितका लागि लिओर रोफेलोवले २९ औं मिनेटमा निर्णायक गोल गरे।

एन्टवेर्प दोस्रो जितसहित छ अंक बनाएर समूह जेका शीर्षस्थानमा छ भने टोटेनहम तीन अंकसहित दोस्रो स्थानमा छ।

युरोपा लिगमा बिहीबार राति नै सम्पन्न अन्य खेलहरूमा होफेन्हाइमले जेन्टलाई ४–१ गोलअन्तरले हराएको छ। 

त्यस्तै इटालियन क्लब रोमा सोफियासँग गोलरहित बराबरीमा रोकिएको छ।