बंगलादेशसँग मैत्रीपूर्ण खेलका लागि फुटबल टिमको अभ्यास सुरु

काठमाडौं – अखिल नेपाल फुटबल संघ (एन्फा) ले राष्ट्रिय फुटबल टोलीको अभ्यास सुरु गरेको छ।

बंगलादेशसँग मैत्रीपूर्ण खेलको तयारीका लागि त्रिपुरेश्वरस्थित दशरथ रंगशालामा अभ्यास सुरु भएको हो।

दुई देशबीच कात्तिक २७ र मंसिर २ गते ढाकामा दुई मैत्रीपूर्ण खेल हुँदै छ। 

नेपालका प्रशिक्षक योहान कालिन स्विडेनमै रहेकाले एन्फाले बालगोपाल महर्जन मुख्य प्रशिक्षकको जिम्मेवारी दिएको छ भने किरण श्रेष्ठ सहायक प्रशिक्षक रहेका छन्। त्यस्तै गोलकिपर प्रशिक्षकका रुपमा विकास मल्ल छन्।

नेपाली राष्ट्रिय खेलाडीको गत बुधबार संकलन गरिएको स्वाबमा चार खेलाडी कोरोना पोजेटिभ पाइएपछि उनीहरु अहिले आइसोलेनसमा छन्। ३४ खेलाडीमध्ये ३० खेलाडी राष्ट्रिय टिमको क्याम्पमा सहभागी भएका थिए।

२०७२ सालको भूकम्पपछि नेपाली राष्ट्रिय टोलीका खेलाडीले पहिलोपटक दशरथ रंगशालामा अभ्यास गरेका हुन्। रंगशालामा नेपाली सिनियर खेलाडीले अन्तिम खेल २०१५ मा विश्वकप क्वालिफायरको खेल खेलेको थियो।

यता फिफा विश्वकप २०२२ र एसिया कप २०२३ को संयुक्त क्वालिफायरका होम गेम पनि यही रंगशालामा हुने भए पनि एसियाली फुटबल महासंघले सो खेल एक वर्षपछि धकेलिदिएको छ।

क्वालिफायरका खेल रोकिएपछि यसअघि राष्ट्रिय टिमका खेलाडीको अभ्यास सुरु भएको थिएन।