मार्सेल्लीविरुद्ध सिटीको सहज जित

काठमाडौं– म्यानचेस्टर सिटीले मंगलबार राति सम्पन्न च्याम्पियन्स लिगको खेलमा फ्रेन्च क्लब मार्सेल्लीलाई ३–० गोलअन्तरले हराएको छ।

मार्सेल्लीको घरेलु मैदानमा सम्पन्न खेलमा जितका लागि पाहुना टिमका फरान टोरेस, इल्के गुन्डोगल र रहिम स्टिर्लिङले १–१ गोल गरे।

खेलको १८ औं मिनेटमा गोल गर्दै टोरेसले सुरुवाती अग्रता बनाएका थिए। उनको गोलसँगै पहिलो हाफमा सिटी एक गोलले अघि रह्यो।

दोस्रो हाफको ७६ औं मिनेटमा गुन्डोगनले गोल गर्दै अग्रतालाई दोब्बर बनाए भने स्टार्लिङले ८१ औं मिनेटमा अर्को गोल थपे।

गोलका लागि केभिज डि ब्रुनले दुई एसिस्ट गरे भने स्टार्लिङले गुन्डोगनलाई ७६ औं मिनेटमा पास उपलब्ध गराएका थिए।

तीन गोलको जितसहित सिटी समूह सीको शीर्षस्थानमा छ। त्यस्तै पराजित मार्सेल्ली भने समूहको पुछारमा छ।

समूह सी अन्तर्गतकै अर्को खेलमा पोर्टोले घरेलु मैदानमा ओलम्पिआकोसलाई २–० गोलले हराएको छ। जितसहित तीन अंक बनाएको पोर्टो समूहको दोस्रो स्थानमा छ भने ओलम्पिआकोस तेस्रो स्थानमा छ।