आईपीएल २०२० : चौथो स्थानमा उक्लियो पञ्जाब

यूएईमा जारी आईपीएल २०२० को सोमबार राति सम्पन्न ४६ औं खेलमा किंग्स इलेभेन पन्जाबले कोलकाता नाइट राइडर्सलाई ८ विकेटले पराजित गरेको छ।

कोलकाताले प्रस्तुत गरेको १५० रनको लक्ष्य पन्जाबले १९ औं ओभरमा २ विकेट गुमाउँदै पूरा गरेको हो। पन्जाबको जितमा ओपनर मन्दीप सिंहले अविजित ६६ रन जोडे। उनले ५६ बलको सामना गर्दै ८ चौका र २ छक्का प्रहार गरेका थिए।

मन्दीप र क्रिस गेलले दोस्रो विकेटका लागि सय रनको साझेदारी गरेपछि पन्जाबले सहज जित हासिल गरेको हो। गेलले २९ बलमा ५१ रन जोडे । उनले २ चौका र ५ छक्का प्रहार गरेका थिए।

त्यसअघि शारजहा क्रिकेट रंगशालामा ब्याटिङको निम्तो पाएको कोलकाताले २० ओभरमा ९ विकेट गुमाउँदै १४९ रन जोडेको थियो। 

जितसँगै पन्जाब कोलकातालाई उछिन्दै अंक तालिकाको चौथो स्थानमा उक्लिएको छ। पन्जाब र कोलकाता दुवैको १२ खेलमा १२ अंक भए पनि नेट रनरेटमा पन्जाब अघि बढेको हो।

मुम्बई, दिल्ली र बेंगलोर ११ खेलमा समान १४ अंकसहित क्रमशः शीर्ष तीन स्थानमा छन्  राजस्थानको १० तथा हैदरावाद र चेन्नईको ८/८ अंक छ।