ईपीएलमा शीर्षस्थानका एभर्टन र आर्सनल पराजित

काठमाडौं– इंग्लिस प्रिमियर लिग(ईपीएल) अन्तर्गत आइतबार राति सम्पन्न खेलमा शीर्षस्थानको एभर्टन साउथह्याम्टनसँग पराजित भएको छ।

साउथह्याम्टनको सेन्ट म्यारी रंगशालामा सम्पन्न खेलमा घरेलु टिमले एभर्टनलाई २–० गोलअन्तरले हराएको हो।

साउथह्याम्टनको जितका लागि जेम्स वर्ड प्रोस र चे एडम्सले समान १–१ गोल गरे। खेलको २७ औं मिनेटमै प्रोसले गोल गर्दै सुरुवाती अग्रता दिलाएका थिए। यता ३५ औं मिनेटमा एडम्सले गोल गर्दै अग्रतालाई दोव्बर बनाए।

एडम्सको गोलसँगै पहिलो हाफमा घरेलु टिम दुई गोलले अघि रह्यो। तर दोस्रो हाफमा कुनै गोल सम्भव नभएपछि शीर्षस्थानको एभर्टनले जारी सिजनमा पहिलो हार बेहोरेको हो।

बरु खेलको ७२ औं मिनेटमा डिफेन्डर लुका डिग्नीले हराब ट्याकल गरेर रेड कार्ड खाँदै बाहिरिनु परेको थियो। अघिबाटै दबाबमा रहेको एभर्टन रेड कार्डपछि थप दबाबमा आयो। 

हारका बाबजुद एभर्टन शीर्षस्थानमा छ भने १० अंक बनाएको साउथह्याम्टन छैंटौं स्थानमा छ।

आईपीएलका आइतबार राति नै सम्पन्न अर्को खेलमा आर्सनल लेस्टर सिटीसँग पराजित भएको छ। ऊ घरेलु मैदानमै आर्सनलसँग १–० गोलअन्तरले पराजित भएको हो।

लेस्टरको जितका लागि ज्यामी वर्डीले निर्णयक गोल गरे। जितसहित १२ अंक बनाएको लेस्टर अंकतालिकाको चौथो स्थानमा छ भने आर्सनल १० औं स्थानमा छ।