प्रिमियर लिगमा लिभरपुलको संघर्षपूर्ण जित

काठमाडौं– एक गोलले पछि परेको अवस्थाबाट लिभरपुलले इंग्लिस प्रिमियर लिगमा संघर्षपूर्ण जित निकालेको छ। उसले घरेलु मैदान एनफिल्डमा शेफिल्ड युनाइटेडलाई २–१ हराउँदै जित निकालेको हो।

लिभरपुलका लागि रोबर्टो फर्मिनो र डियागो जोटाले गोल गरे। फर्मिनोले खेलको ४१ औैं मिनेटमा एक गालले पछि परेको अवस्थामा गोल गर्दै खेललाई बराबरीमा ल्याएका थिए। फर्मिनोको गोलसँगै पहिलो हाफमा खेल बराबरीमा आयो।

दोस्रो हाफको ६४ औं मिनेटमा गोल गर्दै जोटाले लिभरपुललाई अग्रता दिए। सोही अग्रताका साथ साविक विजेता लिभरपुलले खेल जिल्यो।

यता खेलको १३ औं मिनेटमा शेफिल्डका सान्डर बेर्गले पेनाल्टीमार्फत् गोल गर्दै सुरुवाती अग्रता बनाएका थिए। सो अग्रता जोगाउन नसक्दा उसले हारको सामना गरेको हो।

पराजित शेफिल्ड पुछारबाट दोस्रो स्थानमा छ भने लिभरपुल १३ अंकका साथ दोस्रो स्थानमा छ। शीर्षस्थानमा रहेको एभर्टोनको पनि समान १३ अंक छ।

शनिबार राति नै सम्पन्न अर्को खेलमा क्रिस्टल प्यालेसले फुलहामलाई २–१ गोलअन्तरले हराएको छ।