आईपीएलमा हैदराबादविरुद्ध पञ्जाबको जित

काठमाडौं– इन्डियन प्रिमियर लिग(आईपीएल)मा शनिबार राति सम्पन्न दोस्रो खेलमा किंग्स इलेवेन पञ्जाबले सनराइजर्स हैदराबादलाई हराएको छ। दुबईमा सम्पन्न खेलमा पञ्जाबले १२ रनको जित निकालेको हो।

टस हारेर ब्याटिङ सम्हालेको पञ्जाबले पूरा ओभर खेल्दै ७ विकेटको क्षतिमा १२६ रन बनाएको थियो। उसका लागि निकोलस पुरनले अविजित ३२ रन बनाए भने केएल राहुलले २७ रन बनाए। त्यस्तै, क्रिस गेलले २० र मनदिप सिंहले १७ रन बनाए।

यता हैदराबादका सन्दिप शर्मा, जेसन होल्डर र राशिदल खानले समान २–२ विकेट लिए।

१२७ रनको लक्ष्यका साथ मैदान पसेको हैदराबाद अन्तिम बल बाँकी रहँदै ११४ रनमै सम्पूर्ण विकेट गुमाएर पराजित भएको थियो।

हैदराबादका कप्तान डेबिड बार्नर र विजय शंकरले क्रमशः ३५ र २६ रन बनाउनुबाहेक अन्य खेलाडीले सम्झनलायक प्रदर्शन गरेनन्।

यता पञ्जाबका लागि अर्शदिप सिंह र क्रिस जोर्डनले समान ३–३ विकेट लिए।

जित सहित १० अंक बनाएको पञ्जाब अंकतालिकाको पाँचौ स्थानमा छ। ऊ प्लेअफको लागि स्थान सुरक्षित गर्ने दाउमा छ। त्यस्तै पराजित हैदराबाद ८ अंकका साथ छैटौं स्थानमा छ।