नेयमार र एम्बाप्पेले गोल गर्न नसक्दा पीएसजी युनाइटेडसँग पराजित

काठमाडौं– फ्रेन्च क्लब पेरिस सेन्ट जर्मेन (पीएसजी) च्याम्पियन्स लिग २०२०–२१ को पहिलो खेलमै पराजित भएको छ। उसलाई घरेलु मैदानमा इंग्लिस क्लब म्यानचेस्टर युनाइटेडले २–१ गोलअन्तरले हराएको हो।

युनाइटेडको जितका लागि मार्कस रासफर्डले एक गोल गरे भने कप्तान ब्रुनो फार्नान्डेले पेनाल्टीमार्फत गोल गरे।

खेलको २३ औं मिनेटमा पेनाल्टीमा पाएको अवसरको सदुपायोग गर्दै फर्नान्डेसले गोल गरेका थिए। उनको गोलसँगै पहिलो हाफमा पाहुना टिम एक गोलले अघि रह्यो।

दोस्रो हाफमा आक्रामक रुपले देखा परेको पीएसजीले गोल गर्न सकेन बरु युनाइटेडका एन्थोनी मार्सलले आफ्नै पोस्टमा गोल गर्दै पीएसजीलाई गोल कोसेली दिए।

यसबाहेक खेलको ८७ औं मिनेटमा पाउल पोग्बाको पासलाई उपयोग गर्दै रासफोर्डले गोल गरेर युनाइटेडलाई जित दिलाए। जितसहित युनाइटेड ग्रुप जीको दोस्रो स्थानमा छ। उसको तीन अंक छ।

यता पीएसजीका फरवार्ड नेयमार र केलियन एम्बाप्पे भने गोल गर्नबाट चुके। पीएसजी च्याम्पियन्स लिगको साविक उपविजेता पनि हो। पहिलो पराजय भोगेर अंकविहिन बनेको पीएसजी ग्रुपको तेस्रो स्थानमा छ।

यही ग्रुप अन्तर्गत मंगलबार राति सम्पन्न अर्को खेलमा आरबी लाइप्जिकले इस्तानबुल लाई २–० गोलअन्तरले हराएको छ। जिसहित लाइप्जिक ग्रुपको शीर्षस्थानमा छ।