बुटवलमा संस्थापनकी रीतालाई हराउँदै पाैडेल पक्षका खेलराज विजयी

बुटवल- नेपाली कांग्रेस बुटवल उपमहानगरको सभापतिमा तेस्रो कार्यकालका लागि खेलराज पाण्डे निर्वाचित भएका छन्। शनिबार भएको नगर अधिवेशनमा प्रतिद्वन्द्वी रीता केसीलाई फराकिलो मतले पराजित गर्दै पाण्डे पुनः सभापतिमा विजयी भएका हुन्।

पाण्डेले  ४ सय १२ मत प्राप्त गरी विजयी भएका हुन्। केसीले १ सय १४ मत प्राप्त गरिन्। पाण्डे पौडेल समूहबाट उम्मेदवार भएका थिए भने केसी देउवा पक्षबाट चुनावी मैदानमा होमिएकी थिइन्। गृहमन्त्री बालकृष्ण खाँणको समेत साथ र सर्मथन पाएकी केसी पराजित बनिन्।

तर, कांग्रेसको राजनीतिमा कार्यकर्तासँग भिजेका पाण्डेले फराकिलो मतले पराजित गरे। पौडेल पक्षबाटै उपसभापतिमा ज्योति भण्डारी र हितमान पुन विजयी भए।  सचिवमा गंगा पन्थी र छाया पोखरेल विजयी भएको निर्वाचन समितिले जनाएको छ। 

यस्तै नेपाली कांग्रेसका प्रभावशाली नेता बालकृष्ण खाँडको गृहनगर तिलोत्तमामा पौडेल पक्षका उम्मेदवारलाई पराजित गर्दै देउवा पक्षका उम्मेदवार विजयी भएका छन्।

पौडेल पक्षका नारायण न्यौपानेलाई २ मतले पछि पार्दै हरिलाल पाण्डे विजयी भए। पाण्डे हालका नगर सभापति समेत हुन्। न्यौपाने तिलोत्तमा वडा नं ९ का वडाध्यक्ष समेत हुन्।

विजयी पाण्डेले १७४ मत ल्याए भने न्यौपानेले १७२ मत ल्याएका थिए। त्यस्तै सभापतिका अर्का उम्मेदवार हरि तिवारीले ३० मत ल्याए। 

त्यस्तै रुपन्देहीको सैनामैनामा नगर सभापतिमा रण बहादुर खनाल विजयी भएका छन्। दवदह नगरमा सभापतिमा पौडेल पक्षका गुणाखर भुर्तेल निर्वाचित भए। रुपन्देहीमा पार्टी सभापति शेरबहादुर देउवा र वरिष्ठ नेता रामचन्द्र पौडेल पक्षबीच प्रतिस्पर्धा भएको थियो।