कोरोनाबाट विश्वभर एकै दिन ३ लाख ९८ हजार संक्रमित, २४ घण्टामा कहाँ के भयो ? 

काठमाडौं- विश्वव्यापी महामारीका रुपमा फैलिएको कोरोना भाइरसबाट पछिल्लो २४ घण्टामा विश्वभर ३ लाख ९८ हजारभन्दा धेरै संक्रमित भएका छन् । 

अहिलेसम्मको रेकर्ड तोड्दै एकै दिनमा यति धेरै संक्रमित थपिएको पहिलो पटक हो । यसअघि बुधबार (अस्ति) ३ लाख ८२ हजारभन्दा धेरै संक्रमित भएका थिए । 

पछिल्लो एक हप्तामा मात्रै २३ लाख ८९ हजार ५ सय ३४ जना संक्रमित थपिएका छन् भने पछिल्लो एक महिनामा ९२ लाख ९२ हजार ९ सयभन्दा धेरै संक्रमित भएका छन्। 

 ओ मिटरका अनुसार कोरोनाबाट पछिल्लो २४ घण्टामा ६ हजार १ सय ७ जनाको मृत्यु भएको छ भने बुधबार ६ हजार ७५ को मृत्यु भएको थियो । 

पछिल्लो एक हप्तामा मात्रै कोरोनाबाट ३५ हजार ९ सय ९९ जनाको मृत्यु भएको छ भने एक महिनामा १ लाख ५४ हजार २ सय ५४ जनाको मृत्यु भएको छ । 

जोन हपकिन्स विश्वविद्यालयका अनुसार कोरोनाबाट हालसम्म ३ करोड ८८ लाख ३३ हजारभन्दा धेरै संक्रमित भएका छन् भने १० लाख ९७ हजार २ सय २८ को मृत्यु भएको छ । 

पछिल्लो २४ घण्टामा कहाँ कति संक्रमित ? 

कोरोनाबाट पछिल्लो २४ घण्टामा अमेरिकामा ६६ हजार ६१, भारतमा ६० हजार ४ सय ३९, फ्रान्समा ३० हजार ६ सय २१, ब्राजिलमा २९ हजार ४ सय ९८, बेलायतमा १८ हजार ९ सय ८०, अर्जेन्टिनामा १७ हजार ९६, रुसमा १३ हजार ७ सय ५४, स्पेनमा १३ हजार ३ सय १८, इटालीमा ८ हजार ८ सय ४, जर्मनीमा ७ हजार ७४ जना संक्रमित थपिएका छन् । 

नेपालमा भने पछिल्लो २४ घण्टामा ३ हजार ७ सय ४९ जना संक्रमित थपिएसँगै कोरोना संक्रमितको संख्या १ लाख २१ हजार ७ सय ४५ पुगेको छ ।  हिजो मात्रै कोरोनाबाट १९ जनाको मृत्यु भएको थियो भने हालसम्म मृतकको संख्या ६ सय ९४ पुगेको छ।