रोनाल्डोलाई कोरोना संक्रमण

काठमाडौं– इटालियन क्लब युभेन्टसका पोर्चुगिज फरवार्ड क्रिस्टियानो रोनाल्डोलाई कोरोना भाइरस संक्रमण भएको छ।

पोर्चुगिज फुटबल फेडेरेसन (एपपीएफ) ले मंगलबार कोरोना संक्रमण पुष्टि भएको सूचना जारी गरेको हो।

३५ वर्षका उनलाई कुनै लक्षण नदखिएको एफपीएफले बताएको छ। उनले गत सोमबार राति फ्रान्सविरुद्धको खेलमा सहभागिता जनाएका थिए।

उनको टिमले विश्वविजेता फ्रान्ससँग पेरिसमा एक हजार दर्शकमाझ गोलरहित बराबरी खेलेको थियो।

रोनाल्डोकै कप्तानीमा अघिल्लो सिजन उपाधि जितेको पार्चुगलले भोलि बुधबार स्विडेनसँग प्रतिस्पर्धा गर्दैछ। उनीबाहेक अन्य खेलाडीलाई भने कोरोना देखिएको छैन। उनीहरु खेलमा सहभागी हुनेछन्।

रोनाल्डोले गत सेप्टेम्बरको नेसन्स लिगमा स्विडेनलाई हराउँदा राष्ट्रिय टीमका लागि १०० गोल पूरा गरेका थिए। कोरोनाका कारण आइसोलेसनमा बसेपछि उनले नेसन्स लिगको खेलका साथै युभेन्टसबाट १७ अक्टोबरको खेल गुमाउने भएका छन्। साथै उनले च्याम्पियन्स लिगअन्तर्गत सिजनको पहिलो खेल पनि गुमाउने छन्।