मनमोहन प्राविधिक विश्वविद्यालयलाई अनुसन्धान केन्द्र बनाइँदै

विराटनगर– मनमोहन प्राविधिक विश्वविद्यालयलाई अनुसन्धान केन्द्रका रुपमा विकास गरिने भएको छ। 

यस सम्बन्धमा विश्वविद्यालयका प्रमुख डा. सुवासश्री पोखरेल र राष्ट्रिय अनुसन्धान परिषद्का अध्यक्ष डा. महावीर पुनबीच सम्झौता भएको हो। 

प्रमुख डा. पोखरेलका अनुसार दुवै पक्षले कृषि, वन, शिक्षा, स्वास्थ्य, पर्यटन, विज्ञान, प्रविधि, वातावरण, उद्योग, सेवा र नवीनतम क्षेत्रमा अनुसन्धान गर्नेछन्। 

विश्वविद्यालयले अनुसन्धान केन्द्र स्थापनाका लागि आवश्यक जनशक्ति, भौतिक पुर्वाधार र अन्य स्रोतको व्यवस्था गर्ने सम्झौतामा उल्लेख छ। 

सम्झौताअनुसार विश्वविद्यालयलाई अनुसन्धान केन्द्र स्थापनाका लागि आवश्यक पर्ने आर्थिक तथा प्राविधिक सहयोग, सल्लाह, सुझाव र अन्य सहयोग राष्ट्रिय अनुसन्धान परिषद्ले गर्नेछ। 

सम्झौता कार्यक्रममा सामाजिक विकासमन्त्री जीवन घिमिरेले सिर्जनात्मक कामको थालनी भएको बताए। परिषद् अध्यक्ष डा. पुनले अनुसन्धान केन्द्रलाई राष्ट्रिय आविष्कार केन्द्रको मोडलमा सञ्चालन गरिने बताए।