भारतका केन्द्रीय मन्त्री रामविलास पासवानको निधन

काठमाडौं-  भारतका उपभोक्ता, खाद्य एवम् सार्वजनिक वितरण मन्त्री रामविलास पासवानको ७४ वर्षको उमेरमा निधन भएको छ।

पासवानको बिहीबार साँझ निधन भएको उनका छोरा चिराग पासवानले ट्विट गरेर जानकारी दिएका छन्।

लोक जनशक्ति पार्टीका ७४ वर्षीय संरक्षक पासवानको केही ीदन पहिले मुटुको शल्यक्रिया भएको थियो। 

पाँच दशकभन्दा बढी समयदेखि राजनीतिमा सक्रिय पासवान भारतका चर्चित दलित नेतामध्येका एक थिए। 

उनी सन् १९६९ मा पहिलोपटक बिहार विधानसभामा आरक्षित निर्वाचन क्षेत्रबाट संयुक्त सोशलिस्ट पार्टीको सदस्यका रुपमा पुगेका थिए। 

सन् १९७४ मा समाजवादी नेता राज नारायण र जेपीका प्रबल अनुयायीका रुपमा पासवान लोकदलका महासचिव बनेका थिए। सन् १९७७ मा लोकसभामा पुगेपछि उनी आठ पटक उक्त सदनको सांसद बने। 
पासवानले सन् २००० मा लोकजनशक्ति पार्टीको स्थापान गरेका थिए।

उनी पाँचवटा प्रधानमन्त्रीको कार्यकालमा केन्द्रीय मन्त्री थिए। हाल उनको दल उनका छोरा चिराग पासवानले सञ्चालन गरिरहेका छन्।