प्रधानमन्त्री ओलीको स्वास्थ्य स्थिति सार्वजनिक गर्न राप्रपा अध्यक्ष राणाको माग

काठमाडौं– राष्ट्रिय प्रजातन्त्र पार्टी (राप्रपा) का अध्यक्ष पशुपतिशमशेर राणाले प्रधानमन्त्री केपी ओलीको पछिल्लो स्वास्थ्य स्थिति सार्वजनिक गर्न माग गरेका छन्। अध्यक्ष राणाले ट्विट गर्दै प्रधानमन्त्री आइसोलेसनमा बस्नु पर्ने वा नपर्ने बारे सरकारले औपचारिक जानकारी सार्वजनिक गर्नुपर्ने बताएका हुन्।
‘प्रधानमन्त्रीको स्वास्थ्य सार्वजनिक चासो र महत्त्वको विषय हो,’ राणाले भनेका छन्।

प्रधानमन्त्रीका निकट सहयोगी र सल्लाहकारमा कोरोना संक्रमित भएपछि अध्यक्ष राणाले यस्तो धारणा व्यक्त गरेका हुन्। सरकार प्रमुखको स्वास्थ्य अवस्थालाई लिएर जनतालाई सुुसूचित गर्ने विश्वव्यापी प्रचलन कायम रहेको उनको भनाइ छ।

‘प्रधानमन्त्री ओलीका सल्लाहकार, स्वकीय सचिव, सुरक्षाकर्मीहरू कोरोना संक्रमित भएबाट प्रधानमन्त्री स्वयंको स्वास्थ्य स्थिति, आइसोलेसनमा बस्नु पर्ने नपर्ने भन्नेबारे सरकारको औपचारिक जानकारी सार्वजनिक भए उपयुक्त हुने थियो। विश्वव्यापी प्रचलन यस्तै छ,’ राणाले भने।