ओकसमा अन्य मुलुकलाई सहभागी नगराउने अमरिकाको स्पष्टिकरण

वाशिङ्टन- संयुक्त राज्य अमेरिकाले ओकस गठबन्धन (अस्ट्रेलिया, बेलायत र अमेरिका) मा अन्य कुनै पनि मुलुकलाई सहभागी नगराउने स्पष्ट पारेको छ। 

हिन्द-प्रशान्त क्षेत्रमा चिनियाँ प्रभावलाई काउन्टर गर्नका लागि गरिएको रक्षा सम्झौतामा जापानलाई पनि सहभागी नगराइने स्पष्ट पारिएको हो। 

सेप्टेम्बर १५ मा अमेरिकी राष्ट्रपति जो बाइडेन, अस्ट्रेलियाका प्रधानमन्त्री स्कट मोरिसन र बेलायती प्रधानमन्त्री बोरिस जोनसनले त्रिपक्षीय सुरक्षा गठबन्धन ओकसको घोषणा गरेका थिए। यस सम्झौता अन्तर्गत नै अस्ट्रेलियालाई परमाणुबाट निर्मित पनडुब्बी बनाउनका लागि सहयोग गरिने भएको छ। 

ह्वाइट हाउसका प्रेस सचिव जेन साकीले बुधबार भने, 'गत साता भएको ओकस सम्झौतामा अन्य मुलुकहरुलाई पनि सहभागी गराउने विषयमा केही उल्लेख छैन र त्यस्तो कुनै संकेत पनि छैन।' 

राष्ट्रपति बाइडेनले यो सन्देश फ्रान्सका राष्ट्रपति इम्यानुअल म्याक्रोनलाई पनि पठाएको पाइएको छ। उनले हिन्द प्रशान्त क्षेत्रको सुरक्षामा अन्य कुनै पनि मुलुकलाई सामेल नगराइने बाइडेनले स्पष्ट पारेका हुन्। 

उक्त सम्झौताप्रति चीन र फ्रान्सले आपत्ति जनाएका छन्।