प्रदेश ५ : फरार अभियुक्तको खोजीमा विशेष प्रहरी परिचालन 

भैरहवा– प्रदेश ५ का १२ जिल्लामा प्रहरीले फरार अभियुक्तको खोजी तीव्र पारेको छ।

विगतमा विभिन्न आपराधिक घटना गरी लामो समयदेखि लुकीछिपी बसेका र अदालतबाट कसूर ठहर भई कैद र जरिवाना ठहरेका अपराधीलाई पक्राउ गर्न विशेष प्रहरी नै परिचालन गरेको प्रदेश ५ प्रहरी प्रवक्ता वरिष्ठ प्रहरी उपरिक्षक (एसएसपी) राजकुमार बैदवारले बताए । 

उनले भने, ‘फरार अपराधी पहिचान र पक्राउ अभियान अन्तर्गत हामीले विशेष प्रहरी नै परिचालन गरेका छौ । वैशाखयता ३३९ जना पक्राउ गरिसकेका छौं । अरुको खोजी कार्य तीव्र छ ।’

प्रदेश ५ प्रहरीले हालसम्म बाँकेका २७६ जना, दाङका २० जना, पाल्पाका १५ जना, अर्घाखाँचीका ८ जना, गुल्मीका ४ जना, पश्चिम नवलपरासीका ३ जना, कपिलवस्तुका ३ जना, रोल्पाका ३ जना, बर्दियाका २ जना, प्यूठानका २ जना, रुकुमका २ जना र रुपन्देही १  जनालाई पक्राउ गरेको छ ।  

प्रहरीले पक्राउ गरेका मध्ये अंश मुद्दाका ४ जना, कर्तव्य ज्यानका    ७ जना, कुटपिटका ३९ जना, वन अपराधका ७ जना, सार्वजनिक अपराधका    ४ जना, सवारी ज्यानका    १६ जना,  सम्बन्ध विच्छेदका २१ ज्ना, वहुविवाहका १२ जना र लेनदेनका ११ जना छन्।

हरेक जिल्लामा पक्राउ कमान्डर तोकेर अदालतसँग समन्वय गरी काम गरिरहेको प्रहरीले बताएको छ ।

‘हरेक दिन खोजि र पहिचान गरेर काम गरिरहेका छौं । २०५४ सालदेखि फरार रहेका व्यक्ति पनि पक्राउ गर्न प्रहरी सफल भएको छ,’  एसएसपी बैदवारले बताए, ‘अदालतबाट सजाय ठहर भएकाहरुलाई हामी ढिलोचाँडो पक्राउ गरेरै छाड्छौं । बरु आफैं प्रहरी सम्पर्कमा आए हुन्छ ।’