विद्युत् प्राधिकरणको गाडी खोलाले बगायो, एक कर्मचारीको मृत्यु, २ बेपत्ता 

कपिलवस्तु- अविरल वर्षासँगै आएको बाढीले विद्युत् प्राधिकरणको पिकअप भ्यान बगाउँदा प्राधिकरणका एक कर्मचारीको मृत्यु भएको छ भने दुई जना बेपत्ता भएका छन् । 

बा१ञ १०८९ नम्बरको पिकअप भ्यान खोलाले बगाउँदा सवारीचालक माधव पाण्डेको मृत्यु भएको छ । उनी गुल्मीको रेसुंगा नगरपालिकाको उपल्लो तम्घासकाका स्थायी बासिन्दा थिए । 

त्यस्तै, गाडीमा रहेका दुईजना बेपत्ता भएका छन् । बेपत्ता हुनेहरूमा विद्युत् प्राधिकरण जितपुर फ्युज सेवाका प्रमुख कृष्ण पौडेल र अर्काको नाम खुल्न नसकेको जिल्ला प्रहरी कार्यालय प्रमुख एसपी नवराज अधिकारीले जानकारी दिए । 

बुधबार विद्युत् लाइन बनाएर फर्किँदै गर्दा कपिलवस्तुको वाणगंगा नगरपालिका– ७ मोतीपुरस्थित कोइली खोलाले गाडी बगाएको थियो । 

पिकअप भ्यानमा चारजना विद्युत्का कर्मचारी र दुईजना सर्वसाधारण रहेका थिए । एकजना विद्युत्का कर्मचारी र दुईजना सर्वसाधारण पौडी खेलेर जोगिएको प्रहरीले जनाएको छ। 

नेपाल प्रहरी, सशस्त्र प्रहरी र नेपाली सेनाको टोलीले बेपत्ता कर्मचारीको खोजी गरिरहेको छ ।