सिटीमै बस्न मन छ र योग्य पनि छु : ग्वार्डिओला

काठमाडौं– क्याटलान प्रशिक्षक पेप ग्वार्डिओला आज (सोमबार)देखि इंग्लिस प्रिमियर क्लब म्यानचेस्टर सिटीमा पाँचौं सिजन सुरु गर्दैछन्।

चार सिजन स्पेनिस क्लब बार्सिलोना र तीन सिजन जर्मन क्लब बायर्न म्युनिखमा प्रशिक्षण गरेका पेपले सिटीमा पाँचौं सिजन सुरु गर्न लागेका हुन्।

सम्झौताको अन्तिम सिजनमा प्रवेश गरेका ग्वार्डिओलाले आगामी सिजनका लागि पनि आफू योग्ग रहेको बताएका छन्। पेपले अहिलेसम्म सिटीलाई आफू इतिहाद रंगशालामै रहने विश्वास दिलाउन सफल छन्।

उनले क्लब छोडेरै गए पनि सिटीबाट प्रेरित भइरहने बताएका छन्। ‘यदि मैले क्लबमा इच्छा र जितको ज्वाला कम हुँदै गएको देखेँ भने यहाँबाट जानेछु,’ उनने भने, ‘म पहिलेभन्दा राम्रो गरी क्लबको व्यवस्थापन गर्ने तयारीमा छु।’

तर, सिटीले आजबाट सुरु गरेको सिजनले पनि भविष्य निर्धारण गर्ने कुरा उनी नकार्न सक्दैनन्। दुई सिजन लगातार लिग च्याम्पियन बनेको सिटी पछिल्लो वर्ष शीर्षस्थानको लिभरपुलभन्दा १८ अंक कम बनाएको थियो।

‘म यहाँ बस्न मन पराउँछु,’ उनले भने, ‘यो मैले मन पराएको ठाउँ हो, साथै म यहाँ बस्न योग्य पनि छु। क्लबले पछिल्लो दशकमा राम्रो गर्दै गएको छ जसको हिस्सेदार म पनि हो।’

म्यानचेस्टर सिटीले आज राति १ बजे वुल्भ्ससँग प्रतिस्पर्धा गर्नेछ।