तेस्रो खेलमा पीएसजीको पहिलो जित

काठमाडौं– सुरुवाती दुई खेलमा लगातार हार बेहोरेको डिफेन्डिङ च्याम्पियन पेरिस सेन्ट जर्मेन (पीएसजी)ले लिग १ को तेस्रो खेलमा जित निकालेको छ ।

उसले घरेलु मैदानमा मेट्जविरुद्ध १–० गोलअन्तरको जित निकालेको हो । प्रतिस्पर्धात्मक खेलमा जितका लािग जोलियन ड्रक्सलेरले इन्ज्युरी समयमा गोल गरे ।

पहिलो हाफ र निर्धारित ९० मिनेटसम्म पनि गोल नभएपछि बराबरीतर्फ मोडिन लागेको अवस्थामा ड्रक्सलेरले गोल गरेका थिए ।
उनले डि मारियाको क्रसलाई गोलमा बदलेका थिए ।

यता खेलको ६५ औं मिनेटमा पीएसजीका डिफेन्डर अब्दोउलो डियालेले मेट्जका मियनेको सर्ट तानेका कारण दोहोरो एल्लो कार्ड खाँदै बाहिरिए ।

१० खेलाडीमा समेटिएको पीएसजीले पहिलो जित निकाल्दै अंकतालिकामा खाता खोलेको छ ।

तेस्रो चरण सकिँदा ३ अंक बनाएको पीएसजी १५औं स्थानमा छ भने पराजित मेट्ज अंकविहीन रहँदै १८ औं स्थानमा छ ।

प्रतियोगितामा फरवार्ड द्वव नेयमार जुनियर र केलियन एम्बाप्पे भने सहभागी थिएनन् ।

एम्बाप्पेलाई कोराना संक्रमण भएपछि उनी क्वारेन्टिनमा छन भने नेयमार अघिल्लो खेलमा डबल एल्लोकार्ड पाएपछि बाहिरै छन ।