प्याज बोकेका १२ वटा ट्रक जोगबनीमै रोकिए

विराटनगर– नेपाली व्यापारीको प्याज लोड भएका १२ वटा ट्रक भारतीय बजार जोगबनीमा रोकिएका छन्।

भारतले प्याज निर्यातमा रोक लगाएपछि व्यापारीले नेपाल ल्याउन खोजेको प्याज सीमापारि जोगबनी बजारमै अड्किएको हो।

विराटनगर गुद्रीबजारका आलु तथा प्याजका थोक विक्रेता पशुपति भगतले प्याज लोड भएका १२ वटा ट्रक जोगबनीमा रोकिएको बताए।

भारतको इन्दौरबाट आयात हुने प्याजमा रोक लगाएपछि नेपाली व्यापारीको करिब तीन करोड रुपैयाँ बराबरको प्याज सीमापारि रोकिएको उनको भनाइ छ।

प्याजमा रोक लगाएसँगै मूल्यमा पनि पनि असर पर्न थालेको छ। चार दिनअघिसम्म ७५ रुपैयाँ प्रतिकिलो पाइने प्याजको मुल्य बुधबार एक सय रुपैयाँ पुगेको छ।

व्यापारीसँग भएको प्याजको मौज्दात हेर्दा विराटनगरमा एक सातासम्म प्याजको मूल्य प्रतिकिलोग्राम एक सय रुपैयाँभन्दा बढी नहुने भगतले बताए।

भारतीय भूमिमा रोकिएको प्याज निकासी गर्नका लागि प्रशासनले पहल गरिदिनुपर्ने उनीको माग छ।

विराटनगर भन्सार कार्यालयकी सूचना अधिकारी सुनिता पौडेलले मंगलबारसम्म भन्सारबाट प्याज आएको जानकारी दिइन्।

भन्सार कार्यालयका अनुसार साउनमा नौ सय ३७ टन र भदौ २४ गतेसम्म ६ सय ६२ टन गरी कुल एक हजार ापँच सय ९९ टन प्याज आयात भएको छ।

प्रदेश १ मा दैनिक करिब तीन मेट्रिक टन बढी प्याज खपत हुन्छ।